ජාතිවාද ක්‍රීයා කලාපය ආණ්ඩුවේ පැවැත්මට බාධාවක් (VIDEO)

ඥානසාර හිමියන් විසින් ගෙන යන මුස්ලිම් විරෝධි ක්‍රීයා කලාපය රටේ ජාතික සංහිඳියාවට සහ සහජීවනයට පමණක් නොව ආණ්ඩුවේ ආරක්ෂාවට මෙන්ම පැවැත්මටද බාධාවක් බව පුරවැසි බලය සිංවිධානය අනතුරු අඟවනවා.

පසුගිය සති කිහිපය තුළ සිදු වු මුස්ලිම් විරෝධි ප්‍රහාර වලට බොදු බල සේනා සංවිධානයේ නායක ඥානසාර හිමියන් වග කිව යුතු බවට චෝදනා කරන ගත්කතුවර ගාමිණි වියන්ගොඩ වත්මන් යහපාලන ආණ්ඩුව එහිමියන්ට එරෙහිව පියවර නොගැනීම දැඩිව දෝෂ දර්ෂනයට ලක් කළේය.

රාජපක්ෂ පාලන සමයේදී ‍හිටපු ආරක්ෂක ලේකම් ගෝඨභය රාජපක්ෂ සහ හිටපු ජනපති මහින්ද රාජපක්ෂගේ රැකවරණ යටතේ ජාතිවාදය වැපිර වු ඥානසාර හිමියන් හට වත්මන් ආණ්ඩුව ගන්නා ක්‍රීයා මාර්ගය කුමක්ද යන්න ගත්කතුවරයා ප්‍රශ්න කර සිටියේ 23 අඟහරුවාදා අලුත් ව්‍යවස්ථාවක් සඳහා ජාතික ව්‍යාපාරය විසින් පැවැත්වු මාධ්‍ය හමුවකදීය.

සංහිඳියාවට සහ සහජීවනයට බාධාවක්

ආණ්ඩුව මේ සම්බන්ධයෙන් ක්‍රීයා මාර්ග නොගැනීම මහජන අප්‍රසාදයට ලක් වීමට හේතුවන බවට පෙන්වා දුන් ගාමිණි වියන්ගොඩ අලුත් ව්‍යවස්ථාවක් සඳහා ජනමත විචාරණයකදී එය අවාසි සහගත වනු ඇති බවට අවධාරණය කර සිටී.

නව ආණ්ඩුක්‍රම ව්‍යවස්ථාවක් සඳහා ජනතා සහයෝගය ලබා ගැනීමට ව්‍යවස්ථාව තුළ තිබෙන ශක්තිය පමණක් ප්‍රමාණවත් නොවන බැව් පෙන්වා දුන් ඔහු ඒ සඳහා ආණ්ඩුවේ අවශේෂ චර්යාවන්ද බලපාන බවට ප්‍රකාශ කළේය.

මේ මොහොතේ මෙරට තුළ පවතින සියලු ජාතීවාදි ක්‍රීයා මැඩලීමට ආණ්ඩුව මැදිහත්ව ක්‍රීයා නොකලහොත් එය මෙරට ජාතික සංහිඳියාවට සහ සහජීවනයට බරපතල ප්‍රශ්නයක් වනු ඇති බවට පුරුවැසි බලය සංවිධානයේ ගාමිණි වියන්ගොඩ අනතුරු ඇඟවීය.

LEAVE A REPLY

Please enter your comment!
Please enter your name here